والله اني استاهل اشقى واتعب واسهر
واســـتاهل اني اعــاني من بلاويها
غلطـــان ماانكـــر انا ندمان ماانكر
والنـــار ماتحرق الا رجــل واطيها
ماادري ليش انا لــوحبيت مــاافكر
معقوله يعني المحبه تذل راعيها
ماادري شبلاني ولاادري ليش مااصبر
اتسرع احيان واعشق وابتلي فيهــا
وشهي الحكايه نسيت اصلا ومااذكر
لكني وان كنت ناسياهــا ابحكيهــا
ايوه تذكرت شفتها وصــرت متخدر!!
ومن دون مااشعرفؤادي صرت معطيها
بينت لها اني معاها صرت اتبعثر
وانسى اذا جتني الدنيا ومن فيهـــا
واني اذا شفتها فعيونها ابحر
وارفع شراعي ولاالقى موانيها
وانها حياتي وعمري وكل مايخطر
في بالها بس تتمنى واعطيها
وان جيت اعبر لها عن حبي مااقدر
اخاف اجي بكحلها واعميها
الين عرفًت نقاط الضعف والأخطر
عرفًت بعد إني لايمكن اخليها
عاشق متيم هايم وذايب ومبعثر
ياليتها مادرت اني ميت فيها
اغترت البنت وصارت دوم تتكبر
واشوفها غيرت حتى مباديها
لما انادي احسها تبتعد اكثر
عني تباعد ولاكني اناديها
ماتدري اني في لحظه ممكن اتغير
واقول وبكل سهوله ماابيها
والعب على اعصابها اهجرومااهجر
واقلب في ثانيه عاليها واطيها
هذا اللي ناقص تقدم فيني وتأخر
ماتدري اني انا ناويها ناويها
عطيتها احساس ماظني عليه تقدر
وان قلت والله لاانسيها انسيها
وهي تعرفني وتدري زين وتتذكر
اني اذاقلت بسويها اسويها